Abraýly bilim guramasy bolan Times Higher Education (THE) Halkara ynsanperwer ylymlary we ösüş uniwersitetini The Impact Rankings 2023-iň jemleýji sanawyna goşdy diýip, Orient habar berýär.
Reýting ýokary okuw mekdepleriniň Durnukly ösüş maksatlaryna (DÖM) laýyklykda baha berilýän global netijelilik jedwelidir.
Türkmen uniwersiteti aşakda görkezilen DÖM-leriň durmuşa geçirilmegine gatnaşdy:
- 4-nji maksat - ýokary hilli bilim;
- 5-nji maksat - gender deňligi;
- 15-nji maksat – gury ýer ekoulgamlaryny goramak;
- 17-nji maksat - Maksatlara ýetmek üçin hyzmatdaşlyk.
Bu reýtingiň netijeleri uniwersitetleriň işiniň dört esasy ugry: mugallymçylyk, gözleg işleri, dolandyryş we maglumat beriş-düşündiriş işini öz içine alýan hemmetaraplaýyn we deňagramly deňeşdirmäni üpjün etmek üçin netijelilik ölçegleri bilen hasaplanýar.
Reýting 2018-nji ýyldan bäri her ýyl düzülýär we eýýäm ýeterlik meşhurlyk gazandy. Uniwersitetleriň BMG-niň SDG-lerine ýetmekde gazanan üstünliklerine esaslanýan ýokary okuw mekdepleriniň jemgyýete edýän täsirini görkezýär.
The Impact Ranking gurluş taýdan dinamiki bolup, her ýyl has köp uniwersitet DÖM-lere ýetmek isleýändiklerini görkezmäge çalyşýar.
Ýokary okuw mekdebiniň Times Higher Education (THE) žurnaly tarapyndan her ýyl çap edilýän reýting maglumatlar bazasyna girizilmegi ýokary okuw mekdeplerine işlerinde hil taýdan çalt ösýändiklerini görkezmäge, täze dolandyryş usullaryny girizmäge we ösüşleriniň has aýdyň hem-de açyk maglumatlaryny üpjün etmäge mümkinçilik berýär.
The Impact Rankings 2023 -iň soňky sanawyna 112 ýurtdan 1591 ýokary okuw mekdebi girdi. Umumy reýtingde Günbatar Sidneýiň Awstraliýa uniwersiteti yzly-yzyna ikinji ýyl birinji orny eýeledi. Ikinji ýer Angliýanyň Mançester uniwersitetine berildi. Ilkinji üçlügi Kanadanyň Patyşalyk uniwersiteti jemledi.
