NEOM Green Hydrogen Company (NGHC) saud kompaniýasy azotyň we wodorodyň himiki birleşmesi bolan «ýaşyl» ammiak öndürýän dünýädäki iň uly zawody gurmak üçin 8,4 milliard dollar maýa goýdy. Bu barada duşenbe güni kompaniýanyň web sahypasynda habar berildi.
"NGHC 23 ýerli, sebitleýin we halkara banklar hem-de maýa goýum kompaniýalary bilen resminamalara gol çekenden soň, umumy bahasy 8,4 milliard dollar bolan dünýäde iň uly ýaşyl wodorod zawodynyň maliýeleşdirilmegini tamamlady" – diýip, kompaniýanyň metbugat beýanatynda aýdylýar.
Zawodyň 2026-njy ýylyň ahyryna çenli günde 600 tonna ekologiýa taýdan arassa ammiak öndürmegi meýilleşdirilýär. Zawod häzirki wagtda sekizburç şekilinde dizaýn edilip, port we logistika merkezini öz içine alýan Oksagon senagat toplumynda gurulýar. Merkez Gyzyl deňziň kenaryndaky Tabuk welaýatynda 26,5 müň inedördül metr meýdanda gurulýan futuristik megapolisiň uly "Neom" taslamasynyň bir bölegidir.
Mundan başga-da, ACWA Power, Air Products we NEOM-yň bilelikdäki kärhanasy bolan NGHC zawodyň ammiaklarynyň hemmesini 30 ýyllyk satyn almak üçin Air Products bilen aýratyn şertnama baglaşdy.
Ammiakyň klassifikasiýasy, edil wodorod ýaly, olary döretmek üçin ulanylan energiýa çeşmesine baglydyr. Mysal üçin, ýaşyl wodorod we ammiak suwuň elektrolizi arkaly, gaýtadan dikeldilýän energiýa çeşmelerinden peýdalanylyp, mawysy - tebigy gazdan alynýar. Ammiak ýangyç hökmünde ulanylyp bilner.
