Hytaýyň BYD Auto kompaniýasy Özbegistanda öz zawodyny gurup başlady. Bu UzAuto bilen bilelikdäki BYD Uzbekistan Factory atly kärhana bolar. Kärhana Jizak welaýatynda eýýäm bar bolan Jizzakh Auto zawodynyň esasynda döredilýär, şonuň üçinem ol eýýäm öňümizdäki güýzde işe başlar. Meýdança täze energiýa ulaglary (NEV) diýlip atlandyrylýan ugra ýöriteleşer: Hytaýda bu adalga bilen gibridleri we elektrik ulaglaryny atlandyrýarlar.
Başlangyç tapgyrda BYD Uzbekistan Factory “toplama” gurnama bilen meşgullanar we ýylda iki modeliň - Chazor sedanynyň (Destroyer 05 diýlip hem atlandyrylýar) we Song Plus krossoweriniň 50 000-den gowragyny öndürer. Bularyň ikisi hem BYD DM-i ulgamly gibridler, ikisi hem resmi taýdan özbek bazarynda tanyşdyryldy. Olaryň bahalary degişlilikde 323 039 000 sumdan we 367 732 000 sumdan başlaýar.
Şol bir wagtyň özünde BYD Özbegistanda Han elektrik sedanyny 613 581 000 suma hödürleýär, ýöne kompaniýanyň metbugat beýanatynda onuň ýygnalyşyny lokallaşdyrmak niýeti barada hiç zat aýdylmaýar: megerem, bu modeli ýurduň daşyndan getirmek dowam etdirilse gerek.
Wagtyň geçmegi bilen BYD Özbegistanda galyplap çykarmak, kebşirlemek we kuzowyny reňklemek bilen doly aýlawly önümçiligi ýola goýjak bolýar. Bu kärhanada 2000-den gowrak iş ýerini döreder.
