Blue Origin «Artemis» maksatnamasynyň çäklerinde 2029-njy ýylda kosmonawtlaryň Aýa gonmagy üçin modul döreder. Bu barada ABŞ-nyň Aeronawtika we kosmos giňişligini öwrenmek boýunça milli müdirliginiň (NASA) anna güni öz web sahypasynda çap eden beýanatynda aýdylýar diýip, TASS habar berýär.
Beýanatda aýdylyşyna görä, milliarder Jeff Bezosyň “Blue Origin”-ni Blue Moon-yň modulyny “işläp taýýarlamak, döretmek, synagdan geçirmek we tassyklamak” bilen meşgullanar. Ol kosmonawtlary Aýyň üstünde gondurmak we ABŞ-nyň işläp taýýarlaýan Gateway Aý stansiýasy bilen sepleşdirmek üçin ulanylar. Şertnamanyň bahasy 3,4 milliard dollar.
NASA-nyň meýilnamalaryna görä, 2029-njy ýylda Artemis maksatnamasynyň bäşinji tapgyrynyň çäklerinde dört astronawt aşa agyr Space Launch System raketasynyň kömegi bilen kosmosa uçuryljak Orion kosmos gämisinde Aý stansiýasyna eltiler. Iki astronawt Blue Moon gonuş modulynyň kömegi bilen Aýyň üstüne - Günorta polýusyň töweregine gondurylar we ol ýerde olaryň bir hepde töweregi bolmagyna garaşylýar, şondan soň olar stansiýa gaýdyp gelerler. Artemis-5 missiýasynyň öňüsyrasynda, modulyň Ýeriň tebigy hemrasynyň üstüne pilotsyz režimde synag goýberilişini geçirmek meýilleşdirilýär.
2021-nji ýylyň aprelinde NASA Artemis maksatnamasynyň üçünji tapgyrynda ulanylmagy meýilleşdirilýän gonduryş modulyny işläp taýýarlamak üçin telekeçi Ilon Maskyň SpaceX kompaniýasyny saýlady. Blue Origin bilen Dynetics hem şertnama üçin ýüz tutdular, emma olaryň arzalary kabul edilmedi. Blue Origin -iň ýolbaşçylygy Amerikanyň kosmos gullugynyň kararyna täzeden garamagy talap edip kazyýete ýüz tutdy, ýöne NASA-nyň kararyna garşy çykmak synanyşyklary şowsuz tamamlandy.
NASA-nyň beýanatyndan görnüşi ýaly, gonduryş moduly azyndan iki kompaniýa tarapyndan işlenip taýýarlansa bäsdeşlik güýçlener, çykdajylary azaltmaga hyzmat eder we şeýle-de ABŞ-nyň astronawtlary Aýyň üstüne gondurmak mümkinçiligini giňelder.
