Dubaý 2022-nji ýylyň jemleri boýunça täze kärhanalara (Grinfild FDI) göni daşary ýurt maýa goýumlary (GDÝMG) boýunça dünýä sanawynda birinji ýeri eýeledi. Muny ýekşenbe güni emirligiň mirasdüşer şazadasy Hamdan ben Muhammed Al Maktum habar berdi.
Dubaýyň mirasdüşer şazadasy: "Dubaý ýyllyk 89,5% ösüş we 47 milliard dirhem (takmynan 12,8 mlrd dollar) GDÝMG akymlary bilen 2022-nji ýylda täze kärhanalara GDÝMG çekmek boýunça dünýäde yzygider ikinji ýyl birinji orunda durýar" diýip, Twitterde ýazdy. Emirligiň hökümetiniň metbugat gullugy Dubaýdaky täze taslamalara iň köp maýa goýujylaryň ABŞ (20%), Beýik Britaniýa (13%), Hindistan (12%), Fransiýa (5%) we Şweýsariýa (4%) bolandygyny aýtdy.
Mundan ozal, Financial Times-yň seljeriş bölümi bolan fDi Intelligence-iň maglumatlaryna salgylanyp, Arabian Business portaly koronawirus pandemiýasy ýüze çykandan soň, BAE GDÝMG-niň ösüşinde dünýäde birinji orunda durýar diýip habar berdi. Ýurt 2020-nji ýylyň mart aýynda koronawirus Bütindünýä saglygy goraýyş guramasy (BSGG) tarapyndan pandemiýa hökmünde häsiýetlendirilenden bäri GDÝMG taslamalarynda iň köp ösüş gazandy.
DDi Intelligence-iň dünýä sanawynda arap döwletleri ilkinji üç orny eýeledi, emma Ýedi toparyň (G7) ýurtlarynyň birnäçesinde GDÝMG azaldy diýip, Arabian Business ýazýar. Şeýlelikde, Saud Arabystany we Katar degişlilikde ikinji we üçünji orny eýeledi. GDÝMG taslamalarynda iň uly pese gaçmalar Hytaýda, Beýik Britaniýada, Fransiýada we ABŞ-da hasaba alyndy.
