25-nji maýda Türkmenistanda 2022–2023-nji okuw ýylynyň tamamlanmagy hem-de Aşgabat şäheriniň güni mynasybetli çäreler hem-de umumybilim berýän mekdepleriň uçurymlary üçin «Soňky jaň» dabaralary geçiriler. Çärelere görülýän taýýarlyk barada 13-nji maýda Hökümet mejlisiniň barşynda wise-premýer N.Amannepesow habar berdi.
Baýramçylyk dabaralary däp boýunça paýtagtymyzdaky Garaşsyzlyk binasyna hem-de Ahal welaýatynyň Gökdepe etrabynyň Yzgant şäherçesindäki 27-nji orta mekdebinde oturdylan Berdimuhamet Annaýewiň ýadygärligine gül goýmak çäresi bilen başlanar.
Şol gün ýurdumyzyň ähli orta mekdeplerinde “Ýurdumyz berkarar, gadamymyz batly – Arkadag Serdarly ýaşlarymyz bagtly!” atly şygar bilen baýramçylyk dabaralary guralar.
Has tapawutlanan uçurymlara Türkmenistanyň Prezidentiniň, şeýle hem türkmen halkynyň Milli Lideri, Türkmenistanyň Halk Maslahatynyň Başlygynyň adyndan ýadygärlik sowgatlary gowşurylar.
25-nji maýda agşam Türkmenistanyň Döwlet sirkiniň öňündäki meýdançada medeniýet we sungat ussatlarynyň konsertini geçirmek göz öňünde tutulýar. Şeýle hem dabaralar ýurdumyzyň ähli welaýatlarynda geçiriler.
