Beýik Britaniýanyň patyşasy Karl III-ä täç geýdirme dabarasy 20 mln britaniýalyny telewizoryň ekranynyň öňünde ýygnady, bu bolsa 2022-nji ýylyň sentýabr aýynda häzirki monarhyň ejesi Ýelizaweta II-niň jaýlanyşyna tomaşa edenlerden 9 mln adam azdyr. Bu barada ýaýlym auditoriýasyny öwrenmek boýunça geňeşiň maglumatlaryna salgylanyp, "The Guardian" gazeti habar berýär.
Bellenilişi ýaly, Westminster abbatlygyndaky dabara Bi-bi-si ýaýlym korporasiýasynyň dürli telekanallary arkaly 15,5 mln teletomaşaçy, ITV telekanaly arkaly 3,6 mln adam, Sky News telekanaly arkaly 800 müň adam tomaşa etdi. Karl III-ä täç geýdiriş dabarasy 2023-nji ýylda Britaniýanyň telewideniýesinde iň meşhur waka boldy diýip, gazet belleýär.
74 ýaşly Karl III-ä täç geýdirme dabarasy şenbe güni Londondaky Westminster abbatlygynda Ýelizaweta II aradan çykandan tas sekiz aý soň geçirildi. 100-e golaý daşary ýurt liderleri, Beýik Britaniýanyň abraýly syýasatçylary, Arkalaşygyň döwletleriniň general-gubernatorlary, uly administratiw birliklerdäki patyşalaryň lord-kömekçileri, dürli buthanalaryň, ýaragly güýçleriň wekilleri, Nobel baýragynyň eýeleri, jemgyýetçilik we haýyr-sahawat guramalarynyň hem-de adatdan daşary gulluklaryň işgärleri bu çäräniň hormatly myhmanlary boldular.
