Maýadar Uorren Baffetiň (emlägi Forbes žurnalynyň wersiýasyna görä, 112,8 milliard dollar) eýeçiligindäki Berkshire Hathaway amerikan holding kompaniýasynyň amal girdejisi 2023-nji ýylyň birinji çärýeginde (ýanwar-mart) 12,6 göterim ýokarlanyp, 8,065 milliard dollara ýetdi. Bu baradaky maglumat kompaniýanyň hasabatynda görkezilýär diýip, gazeta.ru habar berýär.
Maliýe konglomeratynyň ýokarlanmagynyň esasy bölegi holdingiň ätiýaçlandyryş işinden geldi. Bu ugurdaky ähli girdeji, 2022-nji ýylyň degişli döwründe alnan 1,34 milliard dollar bilen deňeşdirilende, 2,88 milliard dollar boldy.
Hususan-da, Geico awtoulag ätiýaçlandyryjysy awtoulag eýelerinden alnan has ýokary ortaça sylaglaryň tölegleriniň hasabyna 703 million dollar gazandy. Görkeziji yzly-yzyna birnäçe girdejili çärýekden soň ilkinji gezek ýokarlandy.
Kompaniýanyň arassa girdejisi (amal girdejisi + fond bazaryndaky geleşikler boýunça netijeler), 2022-nji ýylyň ýanwar-mart aýlary bilen deňeşdirilende, 6,3 esse artyp, 35,5 milliard dollara ýetdi.
