Belli maýadar Uorren Baffet Berkshire Hathaway kompaniýasynyň paýdarlaryna hoşlaşyk hatyny neşir etdi. Hatynda ol kompaniýanyň 1800 paýnamasyny konwertirlejekdigini we olary öz çagalarynyň haýyr-sahawat gaznalaryna berjekdigini aýtdy. Bloomberg-iň hasaplamalaryna görä, haýyr-sahawat serişdeleriniň mukdary 1,3 mlrd dollardan geçer.
Şeýle-de, Baffet indi paýdarlar üçin ýyllyk hasabatlaryny ýazmajakdygyny we kompaniýanyň ýygnaklarynda çykyş etmejekdigini aýtdy. Ol özüniň yzyny ýöretjek adamyň Greg Abel boljakdygyny tassyklady. Abel şu ýylyň ahyryna çenli Berkshire Hathaway-iň başyna geçer diýlip garaşylýar.
Baffet öz hatynda köne ýoldaşlaryna hem aýratyn orun berdi. Ol 2023-nji ýylda 100 ýaşynda aradan çykan kompaniýanyň wise-başlygy Çarli Mangeri mähir bilen ýatlap geçdi.
Şeýle-de, Baffet adam gymmatlyklary barada şahsy pikirleri bilen paýlaşdy: “Beýiklik pul ýa-da hökmürowanlyk bilen ölçenmeýär. Haçan-da siz beýlekilere kömek edeniňizde, siz dünýä kömek edýärsiňiz. Tam süpüriji hem müdirler geňeşiniň başlygy ýaly ynsandyr”.
Hatynda 95 ýaşly maýadar öz ýagdaýlary barada-da aýtdy: “Geň galaýmaly, ýöne men özümi gowy duýýaryn. Haýal hereket edýän we kynlyk bilen okaýan bolsam-da, häzirem hepdede bäş güni ofisde geçirýärin we ajaýyp adamlar bilen işleýärin. Men giç garradym – ýöne başlan bolsa, bu çynlakaý” – diýip, ol ýazdy.
Baffet şu ýylyň ahyryna çenli Berkshire kompaniýasynyň baş direktory wezipesinden gider. Işewür holdinge 60 ýyldan gowrak wagt ýolbaşçylyk etdi. Ol gazna bazarynyň diri legendasy we dünýäde maýa goýum boýunça esasy guru hasaplanýar.
Berkshire Hathaway birwagtlar ýönekeý bir dokma öndürijisidi. Häzirki günde ol Fortune 500 sanawynda altynjy, dünýäniň jemgyýetçilik kompaniýalarynyň arasynda bazar bahasy boýunça 11-nji, maliýe holdingleriniň sanawynda girdejisi boýunça birinji orny eýeleýär. Ol dürli pudaklardan kompaniýalara, şeýle-de Kraft Heinz, American Express, Coca-Cola, Wells Fargo, IBM, Apple we Bank of America kompaniýalarynda paýlara eýeçilik edýär.
