BSGG-niň baş direktory Tedros Adhanom Gebreýesus global saglygy goraýyş pudagynda COVID-19 bilen bagly adatdan daşary ýagdaý düzgüniniň tamamlanandygyny yglan etdi. Bu barada belta.by habar berýär.
Gebreýesus bir gün öň BSGG-niň adatdan daşary ýagdaýlar boýunça komitetiniň 2020-nj ýyldan bäri hereket edýän adatdan daşary ýagdaý düzgüniniň hereketini bes etmegi maslahat berendigini aýtdy. BSGG-niň ýolbaşçysy bu maslahat bilen razylaşdy. “Men uly umyt bilen COVID-19-yň global adatdan daşary ýagdaý hökmünde tamamlanýandygyny yglan edýärin” – diýip, ol belledi.
Şol bir wagtyň özünde, BSGG ýurtlaryň mundan beýläk hem koronawirus bilen baglylykda hüşgär bolmalydygyny, sebäbi onuň hiç ýere ýitmän, görnüşini üýtgetmegi dowam etdirýändigini belledi. Keseliň täzeden ýaýramagyna sebäp bolup biljek wirusyň täze görnüşleriniň peýda bolmak howpy saklanýar. Koronawirus bilen bagly adatdan daşary ýagdaý düzgüniniň bes edilmegini COVID-19-a bolan ünsi pese düşürmek üçin sebäp hökmünde görmeli däl diýip, ol belledi.
