2023-nji ýylyň 1-14-nji apreli aralygynda Amerikanyň Birleşen Ştatlarynyň Nýu-Ýork şäherinde «UNIPO — 2023» atly Halkara Bütindünýä internet taslama bäsleşigi geçirildi.
Taslama bäsleşigine dünýäniň 20-ä golaý döwletinden okuwçylar gatnaşdy. Türkmenistandan bäsleşige Aşgabat şäheriniň dil derslerini çuňlaşdyryp öwredýän 87-nji ýöriteleşdirilen orta mekdebiniň okuwçylary gatnaşdy. Türkmen toparyna şol mekdebiň matematika mugallymy G.Jelaletdinow ýolbaşçylyk etdi.
Bäsleşik 6 ugur — sungat, ylym, fotosurat, iýmit howpsuzlygy, oýlap-tapyş we maglumat tehnologiýasy boýunça geçirildi. Türkmen mekdep okuwçylary ylym ugry boýunça 3, maglumat tehnologiýasy boýunça 2 sany — jemi 5 sany taslama işi bilen çykyş etdiler.
Ylym ugry boýunça
- Aşgabat şäheriniň dil derslerini çuňlaşdyryp öwredýän 87-nji ýöriteleşdirilen orta mekdebiniň 11-nji synp okuwçysy Aknur Garlyýewa we 10-njy synp okuwçysy Humaý Garlyýewa “Fitoremediasiýa bilen şor topraklary gowlandyrmak”(Improvement of saline soils with Phytoremediation) atly taslamasy bilen altyn medala;
- Şol mekdebiň 10-njy synp okuwçylary Selbi Orazgeldiýewa we Nurana Öwezowa “Üzärlik tohumyndan alkaloidlaryň izolasiýasy” (Alkaloids isolation of Peganum Harmala) atly taslamasy bilen kümüş medala;
- Şol mekdebiň 10-njy synp okuwçysy Nurana Jumabaýewa we 9-njy synp okuwçysy Mähriban Şöhradowa “Ýeralma galyndylaryndan maýa kömelegini almak” (Productionof baker’s yeast from industrial potato wastes ) atly taslamasy kümüş medala mynasyp boldy.
Maglumat tehnologiýasy ugry boýunça
- Şol mekdebiň 10-njy synp okuwçylary Hasan Mekanow we Selim Jomartow “Emeli aň ulanmak arkaly şahsyýeti tanamak we hasaba almak” (Recognizing and registering the person by using AI) atly taslamasy bilen altyn medala;
- Şol mekdebiň 11-nji synp okuwçysy Ezizmuhammet Muhyýew we 10-njy synp okuwçysy Hasan Mekanow “HEZ görkeziji” (HEZ viewer) atly taslamasy bilen altyn medala mynasyp boldy.
