Dünýädäki iň uly alkogolsyz içgileri öndüriji Coca-Cola 2023-nji ýylyň birinji çärýeginde arassa girdejisini 12%, girdejisini 5% ýokarlandyrdy. Bu barada interfax.ru habar berýär.
Kompaniýanyň metbugat relizinde aýdylyşy ýaly, ýanwar – mart aýlarynda onuň arassa girdejisi geçen ýylyň birinji çärýegindäki 2,78 mlrd dollar ýa-da paý üçin 0,64 dollar bilen deňeşdirilende, 3,11 mlrd dollar ýa-da paý üçin 0,72 dollar boldy.
Bir gezeklik faktorlary hasaba almazdan girdeji 5%, paý üçin 0,68 dollara çenli ýokarlandy. Kompaniýanyň çärýek girdejisi bir ýyl ozalky 10,5 mlrd dollara garşy 11 mlrd dollar boldy. Geçen çärýek girdejiniň organiki ösüşi 12% boldy.
Coca-Cola-nyň Demirgazyk Amerikada girdejisi 9%, EMEA sebitinde (Ýewropa, Ýakyn Gündogar, Afrika) 10%, Latyn Amerikasynda 14% ýokarlandy, Aziýa-Ýuwaş umman sebitinde 3% azaldy.
Gazlandyrylan alkogolsyz içgileriň satuwy 3% ýokarlandy, şireli suwlaryň, süýtli içgileriň we ösümlik esasly içgileriň satuwy üýtgemedi, suwlaryň, sport içgileriniň, kofeniň we çaýyň satuwy 4% ýokarlandy.
Coca-Cola 2023-nji ýylda girdejisiniň organiki ösüşiniň 7-8% bolmagyna, düzedilen girdejiniň 4-5% ýokarlanmagyna garaşýar. Ýylyň başyndan bäri kompaniýanyň paýnamalarynyň bahasy 1%-den hem az ýokarlandy.
