Tankerler arkaly daşalýan dünýä nebitiniň möçberi geçen hepde 2020-nji ýyldan bäri rekord derejä ýetdi. Bu barada penşenbe güni Bloomberg Vortexa seljeriş kompaniýasyna salgylanyp habar berdi.
Onuň maglumatlaryna görä, geçen hepde deňiz arkaly daşaýyşdaky nebit 1,27 milliard barrel boldy. Bu görkeziji 2022-nji ýylyň awgust aýyndan bäri 230 million barrele çenli ýokarlandy.
UBS Group-yň seljerijileriniň pikiriçe, görkezijiniň ýokarlanmagy nebitiň tankerler bilen daşalýan aralygynyň artmagy bilen bagly bolup biler diýip, Bloomberg ýazýar. Sebäbi, Ýewropa ýurtlary rus nebitinden ýüz öwrüp, beýleki ýurtlardan satyn alyp başladylar. Russiýa Aziýa ýurtlaryna, hususan-da Hindistana we Hytaýa has köp nebit iberip başlady. Mundan başga-da, ABŞ-nyň ýangyç eksportynyň köpelmegi sebäpli ortaça aralyk artdy.
Agentlik OPEK+ ýurtlarynyň dünýä energiýa bazarynyň durnuklylygyny üpjün etmek maksady bilen nebit önümçiligini 2023-nji ýylyň maý aýyndan ýylyň ahyryna çenli azaltmak kararyna gelendikleri sebäpli görkezijiniň ýakyn wagtda peseljekdigini çaklaýar. Ýurtlar degişli beýany 2-nji aprelde berdiler.
