Germaniýanyň Bayerische Motoren Werke AG (BMW) awtoöndürijisi ýanwar – mart aýlarynda 64 647 elektromobil satdy, bu geçen ýylyň degişli döwri bilen deňeşdirilende 83% köpdür diýlip, kompaniýanyň metbugat relizinde habar berilýär. Muny interfax.ru ýetirýär.
Görkeziji BMW, Mini we Rolls-Royce brendleriniň ulaglaryny öz içine alýar. BMW brendiniň elektromobil satuwy iki esseden gowrak (112%) ýokarlanyp, 55 979 birlige ýetdi.
BMW-niň düzümine girýän üç brendiň bilelikdäki awtomobil satuwy birinji çärýekde 1,5% azalyp, 588 138 birlik boldy. Kompaniýanyň ýolbaşçylygy 2023-nji ýylyň jemi boýunça satuwlaryň sähel ýokarlanmagyna garaşýar.
BMW-niň paýnamalary sişenbe günündäki söwdanyň dowamynda 2% ýokarlandy. Ýylyň başyndan bäri kompaniýanyň kapitallaşdyrmasy 21% ýokarlanyp, 64,89 mlrd ýewro boldy.
