Türkmen halkynyň Milli Lideri Gurbanguly Berdimuhamedow Aşgabada bir günlük sapar bilen gelen Russiýa Federasiýasynyň Tatarystan Respublikasynyň Raisi Rustam Minnihanowy kabul etdi. Bu barada Tatarystan Respublikasynyň Baştutanynyň resmi saýtynda bellenilip geçilýär.
Söhbetdeşler ikitaraplaýyn hyzmatdaşlygyň nebit känlerini gözlemek, tebigy gazy daşamak, energetika we himiýa önümleriniň üpjünçiligi ýaly ugurlaryny ara alyp maslahatlaşdylar.
Şeýle hem taraplar medeni-ynsanperwer ugurlary, şeýle hem bilim we syýahatçylyk hyzmatdaşlygy babatda pikir alyşdylar. Türkmenistanly talyplar Tatarystanda bilim alýan daşary ýurtly talyplaryň sanawynda birinji orunda durýar. Tatarystandaky türkmen talyplarynyň sany 6281-e deňdir.
Rustam Minnihanow Halk Maslahatynyň Başlygyny şu ýylyň 18-19-njy maýynda geçiriljek «Russiýa-Yslam dünýäsi: KazanForum» forumyna gatnaşmaga çagyrdy.
Duşuşykdan soňra Tatarystan Respublikasynyň Baştutany Rustam Minnihanow Türkmenistanyň Söwda-senagat edarasynda geçirilýän söwda toplumynyň sergisine baryp gördi.
