Twitter sosial ulgamy öz saýtynyň logotipindäki gök guşy Dogecoin bitkoininiň nyşany bolan ite üýtgetdi. Täze logotip saýtyň sahypalaryny göreniňde görkezilýär diýip, TASS habar berýär.
Häzirki wagtda bu üýtgeşmäniň hemişelik esasda girizilendigi belli däl. Sosial ulgamyň blogunda, Twitteriň goldaw sahypasynda, şeýle-de sosial ulgamyň eýesi Ilon Maskyň sahypasynda bu sorag boýunça teswir ýok.
Bloomberg agentliginiň habar bermegine görä, üýtgeşmeleriň girizileninden bäri Binance kriptowalýuta biržasynda Dogecoin-iň bahasy 30% ýokarlandy.
Belläp geçsek, Mask öz Twitterinde Dogecoin barada ençeme gezek oňyn seslenme berdi. Ýagny, 2021-nji ýylyň aprel aýynyň başynda ol "Dogecoin-i Aýa ibermäge" wada berdi, maý aýynda bolsa SpaceX kompaniýasynyň 2022-nji ýylda doly derejede bu kriptowalýuta arkaly tölenen şertnama boýunça Aýa hemrany iberjekdigini aýtdy. 2022-nji ýylyň ýanwar aýynda Maskyň beýleki bir kompaniýasy - Tesla käbir çykarýan harytlary üçin töleg hökmünde Dogecoin-i kabul edýändigini mälim etdi.
2022-nji ýylyň sentýabr aýynda maýadarlar topary Masky we onuň birnäçe hyzmatdaşyny iki ýylyň dowamynda Dogecoin kriptowalýutasynyň bahasyny bilgeşleýin 36 müň göterim ýokarlandyrmakda aýyplady.
