CNN habarlar gullugy Goldman Sachs maýa goýum bankynyň hasabatyna salgylanyp, emeli aňyň ösmegi 300 milliona çenli iş ornunyň awtomatlaşdyrylmagyna sebäp bolup biljekdigini aýdýar.
Seljerijileriň pikirine görä, dünýädäki iş orunlarynyň 18% -i awtomatlaşdyrylyp bilner we ösen ykdysadyýetli ýurtlarda bu täsir, ösüp barýan bazarlara garanyňda, has güýçli duýular. Munuň bir sebäbi, akyl zähmetiniň işgärleriniň, el zähmeti bilen meşgullanýanlara garanyňda, has köp töwekgelçilige sezewar boljakdygy bilen düşündirilýär.
Ykdysadyýetçileriň pikiriçe, administratiw işgärler we hukukçylar üçin işsiz galmak howpy has ýokary. Şol bir wagtda, gurluşyk we abatlaýyş işleri ýaly fiziki zähmeti talap edýän ýa-da açyk howada işleýän hünärlere känbir bildirmez.
Bank ABŞ-da we Ýewropada bar bolan işleriň takmynan üçden iki böleginiň “emeli aň bilen dürli derejelere çenli awtomatlaşdyrylandygyny” we ähli işleriň dörtden bir böleginiň tutuşlygyna emeli aň arkaly amala aşyrylyp bilinjekdigini çaklaýar.
Hünärmenleriň pikiriçe, emeli aň ösüp barýarka "zähmet bazary ep-esli sarsgynlara sezewar bolup biler". Şol bir wagtyň özünde, munuň uzak geljekde iş üpjünçiliginiň ösmegine hem goşant goşup biljekdigini bellediler. Goldman Sachs emeli aňyň giňden kabul edilmegi ahyrky netijede öndürijiligi ýokarlandyryp we on ýylda global jemi içerki önümi ýylda 7% ýokarlandyryp biler diýip hasaplaýar.
"Emeli aňyň zähmet bazaryna etjek täsiri ep-esli bolup bilse-de, iş ýerleriň we pudaklaryň köpüsi diňe bölekleýin awtomatlaşdyrylyp bilner hem-de şonuň üçin emeli aň olaryň ýerini tutmaz-da, diňe üstüni ýetirer" - diýip, ykdysadyýetçiler umyt edýärler.
