Hytaý häkimiýetleri 31-nji martdan syýahatçylyk operatorlaryna ýurda daşary ýurt syýahatçylyk toparlaryny getirmäge rugsat berdi. Bu barada HHR-iň Medeniýet we syýahatçylyk ministrliginiň Weibo sosial ulgamyndaky habarynda aýdylýar.
“31-nji martdan syýahatçylyk agentlikleri we onlaýn syýahatçylyk operatorlary tarapyndan daşary ýurt syýahatçylyk toparlarynyň girişi hem-de petekleri we myhmanhanalary bronlamak boýunça hyzmatlary bermegiň gaýtadan dikeldilýändigini habar berýäris” – diýlip, habarda aýdylýar.
Koronawirus pandemiýasy başlany bäri üç ýylyň dowamynda Hytaýda kowide garşy berk çäreler hereket edipdi. Ýöne geçen ýylyň ahyryndan ýurduň häkimiýetleri olary kem-kemden ýatyrmaga başladylar. Geçen ýylyň noýabrynda COVID-19 bilen kesellän ýolagçylary getirendigi üçin gatnawlaryň togtadylmagyny göz öňünde tutýan awiakompaniýalar üçin jeza mehanizmi ýatyryldy. Dekabr aýynyň başynda bolsa HHR-iň häkimiýetleri ýurtda hereket edýän kowide garşy çäklendirmeleri we hökmany PZR barlagyny aýyrdylar.
