Lamborghini markasy Revuelto modelini resmi taýdan hödürledi. Bu Aventador modeliniň ornuna gelýän flagman superkardyr. Revuelto brendiň ilkinji zarýad berilýän gibridi boldy. Onuň güýç gurluşy V12 benzin hereketlendirijisine esaslanýar, ýöne indi üç sany elektrik hereketlendirijisi onuň üstüni ýetirýär. Netijede, güýç gurluşynyň umumy kuwwaty 1015 at güýjüne barabardyr. Bu 2,5 sekuntda 100 km/sag, 7 sekuntda 200 km/sag çenli bat almak we sagatda 350 km-den geçýän iň ýokary tizligi görkezmek üçin ýeterlikdir. Bu barada autonews.ru belleýär.
Gibrid güýç gurluşynyň ýüregi V12 boldy. 6,5 l göwrümli bu benzin hereketlendirijisi 825 at güýjüni berýär, ýöne onuň agramy bary-ýogy 218 kg bolup, bu Aventador-yň hereketlendirijisinden 17 kg azdyr. Tirsekli wal minutda 9250 öwrüm eden ýagdaýynda hereketlendiriji iň ýokary kuwwaty görkezýär. Benzin hereketlendirijisi bilen bilelikde iki öl birleşdirijili sekiz basgançakly “robot” işleýär.
Elektrik hereketlendirijileriniň umumy kuwwaty 190 at güýjüne deň. Öndüriji çekiş batareýasynyň ulgamdan zarýad almagyna ýol berýär, ýöne arassa elektrik çekişde ýol ätiýajy barada maglumatlary bermeýär.
Bu markanyň taryhynda iň soňky benzin V12 bolmagy ähtimal. 2035-nji ýyldan Ýewropada içerki ýangyç hereketlendirijili awtomobilleriň satuwyny gadagan etmek meýilleşdirilýär. Ýöne nemes we italýan superkar öndürijileriniň düzgünlere basyş etmegi sebäpli, şeýle awtomobilleriň benzin bilen däl-de, sintetiki ýangyç bilen doldurylan ýagdaýynda satuwyna rugsat berlip, düzgünler gowşadylyp bilner.
Revuelto-nyň satuwy 2023-nji ýylyň ahyrynda başlaýar. Öňki Aventador modeli häzir Ýewropada iň ýönekeý görnüşde, takmynan, 400 müň ýewro düşýär. Täze model bolsa has gymmat bolar.
