Hytaýdan mekdep okuwçysy Rubigiň kubigini çözmegiň ortaça wagty boýunça rekordy täzeledi. Dokuz ýaşly Ýihen Wan öňki rekord eýeleri bolan ABŞ-dan Maks Parky we Polşadan Timon Kolasinskini yzda galdyrdy. Olar 4,86 sekunt netijäni gazanypdylar. Zehinli oglanjygyň wagty bolsa 4,69 sekunt boldy. Bu barada Ginnesiň rekordlar kitabynyň saýtyna salgylanyp, MIR24 habar berýär.
Bu Malaýziýanyň Kuala-Lumpur şäherinde geçirilen tapmaça ussatlary üçin ýaryşlaryň ýarym finaly wagtynda bolup geçdi. Wan Rubigiň kubigini 4,35 sekuntda, 3,90 sekuntda, 4,41 sekuntda, 5,31 sekuntda we 6,16 sekuntda bäş gezek düzdi. Halkara kubing assosiasiýasynyň düzgünlerine laýyklykda, ortaça görkeziji hasaplanylanda iň çalt we iň haýal netijeler göz öňünde tutulmaýar.
Ýiheniň bäş çözgüdiniň ikinjisi (3,90 sekuntda) tutuş taryhyň dowamynda ýekelikde çözmegiň tizligi boýunça bäşinji boldy. Iň çalt ýekelikde çözmek boýunça rekordy bolsa 2018-nji ýylda bu kubigi 3,47 sekuntda düzen hytaýly Ýuşen Du saklaýar.
Ýihen 2023-nji ýylda gatnaşan spidkubing boýunça üç ýaryşynda-da ýeňiş gazandy. Bular koronawirus pandemiýasyndan soň Aziýada geçirilen ilkinji ýaryşlaryň biri boldy.
