Çiliniň futbol boýunça çempionatynda «Kobresal» we «Kolo-Kolo» klublarynyň arasynda geçirilen oýunda uzak aralykdan gol geçirmekde täze rekord goýuldy. Ýer eýeleriniň derwezebany pökgini öz derwezesiniň çäginden garşydaşlarynyň derwezesine iberdi.
Duşuşygyň ahyrynda «Kobresal» 2:0 hasabynda öňe saýlandy we üçünji pökgini tora girizdi (jemi hasap — 3:1). Ony argentinaly 35 ýaşly derwezeban Leandro Rekena geçirdi. Aslynda ol, dogrusyny aýtsaň, pökgini «Kolo-Kolonyň» derwezesine çenäbem depmändi - ýöne, topy hüjümçilere geçirmek isläpdi. Emma bu — dünýä taryhynda iň uzak aralykdan salnan gol boldy duruberdi.
Garşydaşlarynyň derwezebany Braýan Kortes Rekena «kömek etdi»: ol derwezeden şowsuz hem-de gaty uzaga çykdy, eli bilen oýnap bilmedi we kellesi bilenem topdan sowa geçdi. Top göni baryp "Kolo-Kolonyň» derwezesine girdi.
TNT Sport Chile-niň žurnalistleri topuň geçen aralygyny hasapladylar - 101 metr . Häzir Rekenanyň uran golunyň uzaklygyny takyk kesgitlemek üçin meýdany goşmaça ölçemek gerek. "Kobresal" rekordy Ginnesiň kitabynda bellige aldyrmak üçin ýüz tutmak isleýär.
Häzirlikçe takyk pökgi urgusynyň uzaklygy boýunça resmi taýdan dünýä rekordy Angliýanyň “Nýuport” toparynyň derwezebany Tom Kinge degişlidir. 2021-nji ýylda ol "Çeltenhemiň" derwezesine 96 metr 1 sm aralykdan gol geçirdi. Ginnesiň rekordlar kitabynyň wekilleri bu netijäni ýörite diplom bilen tassykladylar.
