20-nji martda günüň ikinji ýarymynda Prezident Serdar Berdimuhamedow Katar Döwletiniň bilim, ylym we jemgyýetçilik ösüş gaznasynyň binasyna baryp gördi. Bu ýerde Serdar Berdimuhamedow Qatar Foundation-yň ýolbaşçylary bilen duşuşdy.
Doha şäherinde ýerleşýän Gaznanyň ştab-kwartirasynyň esasy girelgesinde Serdar Berdimuhamedowy Kataryň bilim, ylym we jemgyýetçilik ösüş gaznasynyň uniwersitete çenli bilim bölüminiň ýolbaşçysy hanym Abira Al-Halifa garşylady.
Bu ýerde Serdar Berdimuhamedow 1995-nji ýylda Şeýh Hamad bin Halifa Al-Taniniň Permany bilen esaslandyrylan Gaznanyň esasy wezipeleri bilen tanyşdyryldy.
Bellenilişi ýaly, Qatar Foundation-yň howandarlygyndan 50-den gowrak bilim we ylym barlag edaralary döredildi. Gazna Katarda köpugurly innowasion merkezi bolup, bu ýerde ýerli alymlar ählumumy meseleleri çözmegiň üstünde işleýärler.
Education City şäherinde 12 inedördül kilometrden gowrak bolan barlag we jemgyýetçilik merkezleri, şeýle hem belli halkara ýokary okuw mekdepleriniň, şol sanda Karnegi-Mellona uniwersitetiniň, Jorjtaun uniwersitetiniň, HEC Paris, Demirgazyk-Günbatar uniwersitetleriniň hem-de Tehasyň A&M uniwersitetiniň, Wirjini Arkalaşyk uniwersitetiniň Sungat mekdebiniň, Weill Cornell Medicine we Londonyň Uniwersitet kollejiniň, şeýle hem Hamad bin Halifa uniwersitetiniň hem-de şol uniwersitetiň “Innowasion barlaglar” bölüminiň şahamçalary açyldy.
Soňra döwlet Baştutanyna Qatar Foundation baradaky wideoşekiller görkezildi. Durnukly adam kuwwatyny ösdürmäge çalyşýan, bilime esaslanýan ykdysadyýetli ýurduň durmuş we ykdysady abadançylygyny maksat edinýän innowasion we açyk jemgyýeti goldamak, bu gaznanyň esasy maksadydyr.
Gaznanyň işi bilen tanyşlyk tamamlanandan soňra, döwlet Baştutany belent mertebeli myhmanlar kitabynda ýadygärlik ýazgy galdyrdy.
