20-nji martda Katar döwletine saparynyň ikinji gününde Prezident Serdar Berdimuhamedow Kataryň öňdebaryjy kompaniýalarynyň we maýa goýum edaralarynyň ýolbaşçylary bilen duşuşdy.
«Sheraton Grand Doha Resort and Convention» myhmanhanasynyň «Salwa» zalynda geçirilen işewürlik çäresine Kataryň söwda-senagat edarasynyň, Kataryň işewürler Assosiasiýasynyň, şeýle hem Delta Group, Turn Key Trade&Contracting, Shaheen Al Mohannadi Group, Bin Twar Group ýaly iri kompaniýalarynyň wekilleri gatnaşdylar.
Prezident Serdar Berdimuhamedow çykyşynyň dowamynda energetika, oba hojalygy toplumy, dokma pudagy, ylmy we innowasion önümçilikler, şähergurluşygy, energiýanyň dikeldilýän çeşmelerini ulanmak ýaly pudaklarda maýa goýum işini ösdürmegiň mümkinçiliklerini giňişleýin ara alyp maslahatlaşmagy teklip etdi.
Söwda-ykdysady ugur boýunça hyzmatdaşlyk mümkinçilikleriniň entek doly möçberde ulanylmaýandygyna aýratyn üns çekildi. Şunuň bilen baglylykda, Türkmenistanyň Katar Döwleti bilen bilelikdäki işewürler geňeşiniň döredilmeginiň tarapdarydygy tassyklanyldy.
Hakyky giň möçberli, ösüşe niýetlenen bilelikdäki taslamalaryň zerur bolan döwrüne ýetilendigini belläp, Serdar Berdimuhamedow bu taslamalaryň ykdysady hyzmatdaşlygyň hereketlendiriji güýjüne öwrülip, täze maýa goýumlaryny çekmek, garyşyk önümçilikleri döretmek, häzirki zaman hyzmatlar ulgamyny emele getirmek üçin täze mümkinçilikleri açýandygyny aýtdy.
Mundan başga-da, Katar döwletiniň maliýe ulgamynyň, maliýe-karz edaralarynyň, ätiýaçlandyryş kompaniýalarynyň, biržalarynyň döreýşiniň we hereketiniň oňyn tejribesini öwrenmäge uly gyzyklanma bildirilýändigi barada aýdyldy.
«Biziň ýurdumyz islendik netijeli teklipler, jogapkärli we ygtybarly hyzmatdaşlyk üçin hemişe açykdyr» diýip, döwlet Baştutany aýtdy.
Duşuşygyň ahyrynda döwlet Baştutany Katar kompaniýalarynyň wekilleriniň haýyşy boýunça olar bilen ýadygärlik surata düşdi.
