Günorta Florida uniwersitetiniň professory, Dr. Deepsea hökmünde-de belli bolan, Jozef Dituri adam organizminiň adatdan daşary basyş şertlerinde suwuň astynda uzak wagtlap bolmakdan nähili baş çykarýandygyna düşünmek üçin üýtgeşik tejribe geçirer. 55 ýaşly alym suwuň astynda 9 metrden gowrak çuňlukda 100 gün ýaşamagy meýilleşdirýär. Bu barada New York Post habar berdi diýip, rbclife.ru belleýär.
“Biz biomedisina inženeriýasy barada gürrüň ederis, biologiýa pudagynda tejribeleri geçireris – biz wagtymyzy örän gowy geçireris” – diýip, Dituri belleýär.
Mart aýynyň başyndan bäri ol meýdany 9 inedördül metr bolan basseýnde bolýar. Tejribe geçirijiniň pikiriçe, ol şol ýerde ýene birnäçe aý bolup biler, bu döwürde onuň saglyk ýagdaýy bolsa gowulaşmalydyr.
Lukmanlar topary alymyň ýagdaýyny barlamak üçin yzygiderli onuň ýanyna suwa girerler. Tejribäniň ahyrynda hünärmenler professordan gan analizini alarlar, elektrokardiogramma geçirerler, şeýle-de uzak wagtlap ýekelikde bolmagyň netijesine baha bermek üçin onuň psihososial we psihologiki ýagdaýyny seljererler.
Günorta Florida uniwersitetiniň işgärleri bu tejribäniň suwuň astyndaky ýaşaýşyň hakykatdanam mümkindigini we hatda garrama bilen baglanyşykly keselleriň öňüni alyp biljekdigini subut etmäge ukyplydygyny belleýärler. Alymlar muny Dituriniň öz netijeleri bilen düşündirýärler: ol ýokary basyş şertlerinde öýjükleriň bäş günüň dowamynda iki esse köpelendigine ünsi çekdi.
