Bütindünýä Saglygy goraýyş guramasynyň baş müdiri Tedros Adhanom Gebreýesus 2023-nji ýylda COVID-19 pandemiýasynyň tamamlanjakdygyna we bu kesel bilen baglanyşykly halkara adatdan daşary ýagdaý režiminiň ýatyryljakdygyna ynam bildirýär. Bu barada ol saglygy goraýyş ulgamyna goşan goşandy üçin oňa Tomas Frensis medaly berlende aýtdy. Beýanyň teksti BSGG-niň metbugat gullugy tarapyndan ýaýradyldy diýip, TASS habar berýär.
“Men şu ýyl belli bir ýagdaýda COVID-19-yň jemgyýetçilik saglygy goraýyş ulgamynda halkara derejesindäki adatdan daşary ýagdaý hem-de pandemiýa hökmünde tamamlanandygyny aýdyp biljekdigimize ynanýaryn” – diýip, Gebreýesus belledi.
Ol 11-nji martda BSGG-niň “global COVID-19 ýaýrawyny pandemiýa hökmünde häsiýetlendirip boljakdygyny ilkinji gezek yglan edeninden bäri dogry üç ýylyň dolandygyny ýatlap geçdi. Bu “dünýä KHBS-niň ünsüni çeken möhüm pursat boldy”. Ýöne, onuň aýtmagyna görä, BSGG-niň nukdaýnazaryndan, alty hepde öň – 2020-nji ýylyň 30-njy ýanwarynda guramanyň koronawirus ýaýrawyny jemgyýetçilik saglygy goraýyş pudagynda halkara derejesindäki adatdan daşary ýagdaý diýip mälim etmegi has möhüm pursat boldy.
“Häzir biz, gürrüňsiz, pandemiýanyň islendik döwrüne garanyňda has gowy ýagdaýdadyrys” – diýip, baş müdir belledi. Ol “ilkinji gezek her hepdede hasaba alynýan ölüm sanynyň azalýandygyna” ünsi çekdi. Ol ýagdaýyň ep-esli gowulaşandygyny belledi.
Gebreýesus pandemiýanyň özleşdirmesi zerur bolan “sapaklarynyň” arasynda saglygy goraýyş ulgamyna, ylmy gözleglere we halkara hyzmatdaşlyga goýulýan maýa goýumlaryň ähmiýetini belläp geçdi.
