4-nji martda Aşgabatda «Gül zemin» söwda we dynç alyş merkeziniň 3-nji gatynda kitap ýarmarkasy geçiriler. Bu barada Türkmenistanyň Telewideniýe, radiogepleşikler we kinematografiýa baradaky döwlet komitetiniň «Mahabat» müdirliginiň saýtynda habar berildi.
Kitap ýarmarkasy 17:00-19:00 aralygynda geçiriler.
Halkara Zenanlar güni mynasybetli guraljak bu ýarmarkada «Mahabat» müdirliginiň çagalar üçin çykarýan kitap önümleriniň görkezilmegine, Ýaşlyk teleýaýlymyň «Siziň üçin, körpeler!» gepleşiginiň, Türkmen döwlet gurjak teatrynyň, Türkmenistanyň Döwlet sirkiniň artistleriniň çykyşyna garaşylýar.
Şeýle hem ýarmarkada dürli ýaşly çagalar üçin kitaplaryň satuwy guralar.
Kitap ýarmarkasyny Türkmenistanyň Telewideniýe, radiogepleşikler we kinematografiýa baradaky döwlet komitetiniň «Mahabat» müdirligi, Türkmenistanyň Bazar Amanow adyndaky döwlet çagalar kitaphanasy hem-de Türkmenistanyň Kärdeşler arkalaşyklarynyň Milli Merkezi tarapyndan guralýar.
