Geely hytaý kompaniýasy orta we premial segmentli modeller bilen ekologiki awtoulaglaryň täze brendini işe girizdi. Bu barada Şanhaýyň “Isaý global” habarlar çeşmesi habar berdi diýip, bigasia.ru belleýär.
Onuň maglumatlaryna görä, kompaniýa 2025-nji ýyla çenli Geely Galaxy brendi bilen ýedi modeli bazara çykarmagy meýilleşdirýär. Olardan üçüsi 2023-nji ýylda, üçüsi 2024-nji ýylda, ýene bir model bolsa 2025-nji ýylda hödürlener. Birinjisi şu ýylyň ikinji çärýeginde bazara çykmaly L7 modeli bolar. Bu brend bilen Geely hem gibrid hereketlendirijili, hem doly elektrik awtomobilleri öndürýär.
Çeşme täze brendiň döredilmeginiň Hytaýyň elektromobil bazarynda BYD we Changan kompaniýalary tarapyndan güýçli bäsdeşligiň bolmagy bilen baglanyşyklydygyny belleýär. Hytaýyň ýeňil awtomobilleriň assosiasiýasynyň maglumatlaryna görä, geçen ýyl Geely awtomobilleriniň bölekleýin satuwy boýunça Hytaýda BYD, Changan, Shanghai Volkswagen we FAW-Volkswagen kompaniýalaryndan yza galyp, bäşinji orna çykdy. Kompaniýanyň satuwynyň ösüş depgini bary-ýogy 1,8% boldy (mysal üçin, BYD-yň 149%-ine garşy).
Ekologiki awtoulaglar meselesinde Geely birneme öňde bolup, dördünji orny eýeleýär. Geçen ýyl şeýle ulaglardan 304,9 müňüsi satyldy, bu hem 2021-nji ýylyň görkezijilerinden 278% köpdür.
