Halkara Futbol federasiýasy (FIFA) Fransiýanyň “Pari Sen-Žermen” klubunyň argentinaly hüjümçisi Lionel Messini 2022-nji ýylyň iň gowy oýunçysy diýip saýlady. Bu barada TASS habar berýär.
Finalçylaryň üçlügine Messiniň klubdaşy fransiýaly Kilian Mbappe we Ispaniýanyň “Realynyň” fransiýaly hüjümçisi Karim Benzema hem girdi. Messi Argentinanyň milli ýygyndysy bilen bilelikde 2022-nji ýylda Katarda geçirilen dünýä çempionatynda ýeňiş gazandy we ýaryşyň iň gowy oýunçysy boldy. Argentinaly hüjümçi dünýä birinjiliginde sekiz gol saldy, Mbappe dokuz gol bilen ýaryşyň iň gowy bombardiri boldy.
Benzema 2022-nji ýylda “Real” bilen bilelikde Ispaniýanyň çempionatynda we Çempionlar ligasynda ýeňiş gazanyp, iki ýaryşyňam iň gowy bombardiri boldy.
FIFA tarapyndan iň gowy oýunçy üçin baýrak 2017-nji ýyldan bäri berilýär, Messi bu baýragy ikinji gezek aldy. Şeýle-de, portugaliýaly Kriştianu Ronaldu we polşaly Robert Lewandowskiý bu baýragyň iki gezek eýesi boldy, baýragy bir gezek horwatiýaly Luka Modriç aldy.
Zenanlar futbolynda ýylyň iň gowy oýunçysy yzygider ikinji gezek “Barselonada” çykyş edýän ispaniýaly Aleksiýa Putelýas boldy.
