Režissýor Dominik Mollyň «Syrly ölüm» trilleri (fransuz dilinde asyl ady – La Nuit du 12) Parižde “Iň gowy film nominasiýasynda “César” baýragyna eýe boldy. Fransiýanyň ýokary kinematografiki baýragynyň 48-nji gowşurylyş dabarasy Canal+ tarapyndan ýaýlyma berildi diýip, TASS habar berýär.
Moll režissýor hökmünde baýraga mynasyp boldy, onuň kartinasynda oýnan aktýor Buli Lanners bolsa ikinji plandaky iň gowy erkek keşbi üçin baýrak aldy.
Iň gowy aktrisa “Pariži ýene bir görsek” (Revoir Paris) filminde oýnan Wiržini Efira boldy. Erkek keşbi üçin baýrak “Pasifikşn: adalardaky jebir” (Pacifiction: Tourment sur les lles) filmindäki aktýorlyk işi üçin Benua Mažimele berildi.
Ikinji plandaky zenan keşbi üçin baýragy Lui Garreliň “Bigünä” (L’Innocent) filminde oýnan Noemi Merlan aldy. Garreliň filmi “Iň gowy original ssenariýa” nominasiýasynda-da ýeňiş gazandy.
Iň gowy doly metražly animasion film Mihaela Pawlatowanyň “Meniň owgan maşgalam” (Ma famille afgane) kartinasy boldy. Iň gowy wizual effektler üçin baýragy Žan-Žak Annonyň 2019-njy ýylyň 15-nji aprelinde Parižiň Bogorodisa ybadathasynda bolan ýangyn barada gürrüň berýän “Notr-Dam ýanýar” (Notre-Dame brule) filmi aldy.
Daşary ýurt filmleriniň arasynda režissýor Rodrigo Sorogoýeniň “Ýyrtyjylar” (As bestas) ispan kartinasy ýeňiş gazandy. Abraýly “César” baýragyny “Söweşijiler kluby” we “Benjamin Battonyň syrly wakasy” filmleri bilen belli bolan Dewid Finçer aldy.
Fransiýanyň esasy kinematografiki baýragy bolan “César” 1976-njy ýyldan bäri Kinematografiki sungat we tehnika akademiýasy tarapyndan berilýär.
