Türkmenistanda 2023-nji ýylda saýaly, pürli, miweli baglaryň we üzümiň 3 million düýp nahaly ekiler. Degişli Karara Türkmenistanyň Prezidenti gol çekdi.
Resminama laýyklykda, ministrlikler, pudaklaýyn dolandyryş edaralary, Aşgabat şäheriniň häkimligi we beýleki edaralar 1,5 million düýp nahalyny; welaýatlaryň häkimlikleri bolsa 1,5 million düýp nahalyny eker.
Ministrlikler, pudaklaýyn dolandyryş edaralary, welaýatlaryň we Aşgabat şäheriniň häkimlikleri miweli baglaryň we üzüm nahallarynyň aýratyn kesgitlenen ýer böleklerinde görnüşleri boýunça ekilmegini hem-de ekilen saýaly, pürli, miweli bag we üzüm nahallarynyň damjalaýyn usulda suwarylmagyny üpjün etmäge borçly edildi.
Şeýle hem resminama bilen, Oba hojalyk we daşky gurşawy goramak ministrligine degişli ministrlikleri pudaklaýyn dolandyryş edaralaryny, welaýatlaryň, Aşgabat şäheriniň häkimliklerini ýeterlik mukdarda üzüm, şeýle-de 3 ýyllyk bag nahallary bilen üpjün etmek hem-de şolaryň ekilişine we ideg edilişine gözegçilik etmek tabşyryldy.
