Şu gün, 22-nji fewralda Prezident Serdar Berdimuhamedow Bahreýniň Patyşasy Şeýh Hamad bin Isa Al Halifa bilen ikiçäk gepleşikleri geçirdi. Bu barada «Türkmenistan» gazetiniň elektron neşiri habar berýär.
Bahreýn Patyşalygyna ilkinji resmi saparynyň çäklerinde irden Bahreýniň Patyşasynyň «Al Gudaýbiýýa» köşgüniň öňündäki meýdançada Türkmenistanyň Prezidentini resmi garşylamak dabarasy geçirildi. Ondan soňra ikiçäk hem-de giňeldilen düzümde ýokary derejeli türkmen-bahreýn gepleşikleri geçirildi
Iki ýurduň Liderleri söwda-ykdysady, medeni-ynsanperwer ulgamdaky hyzmatdaşlygy ilerletmegiň mümkinçilikleri barada pikir alyşdylar.
Iki ýurduň wekiliýet agzalarynyň gatnaşmagynda giňeldilen düzümde geçirilen gepleşikleriň dowamynda türkmen-bahreýn gatnaşyklaryny mundan beýläk-de ösdürmek bilen bagly meseleleriň giň toplumy ara alnyp maslahatlaşyldy. Döwlet Baştutany we Bahreýniň Patyşasy ikitaraplaýyn hyzmatdaşlygyň häzirki ýagdaýydyr geljekki mümkinçilikleri, özara gyzyklanma bildirilýän sebit hem-de halkara gün tertibiniň möhüm meseleleri babatda garaýyşlaryny beýan etdiler. Merkezi Aziýa we Ýakyn Gündogar sebitinde durnuklylygy, howpsuzlygy berkitmek, syýasy-diplomatik ulgamda ysnyşykly hereket etmek, iki ýurduň tebigy hem-de geografik artykmaçlyklaryny nazara alyp, söwda-ykdysady, ýangyç-energetika, maýa goýum, ulag-logistika ugurly hyzmatdaşlygy işjeňleşdirmek, medeni-ynsanperwer ulgamda ýola goýlan hyzmatdaşlygy çuňlaşdyrmak bilen bagly meseleler türkmen-bahreýn gepleşikleriniň esasyny düzdi.
