Türkmenistanyň Bilim ministrligi ýurdumyzda diplomlary ykrar edilýän uniwersitetleriň sanawynyň üstüni doldurdy. «Daşary ýurt döwletlerinde berlen ýokary we orta hünär bilimi hakyndaky resminamalary Türkmenistanda ykrar edilmegiň tertibine» degişli üýtgeşmeler girizildi.
Sanawa Moskwanyň halkara derejesindäki «Uniwersitetiň üç missiýasy» we QS World University Rankings reýtinglerine giren ýokary okuw jaýlary goşuldy.
2022-nji ýylda «Uniwersitetiň üç missiýasy» sanawyna 103 ýurtdan 1800 uniwersitet girdi. Reýtingiň öňdelikçileriniň arasynda Garward, Massaçusets tehnologiýa instituty, Kembrij, Oksford we London uniwersitet kolleji bar.
QS World University Rankings — bu dünýädäki uniwersitetleriň işini seljermekde ýöriteleşen iňlis kompaniýasy Quacquarelli Symonds tarapyndan düzülen, uniwersitetleriň her ýyl täzelenýän reýtingi. QS reýtingi dünýäde uniwersitetleriň iň abraýly üç reýtinginiň biri hasaplanýar.
