Prezident Serdar Berdimuhamedow Täjigistan Respublikasynyň Prezidenti Emomali Rahmona ýurduň Daglyk-Badahşan awtonom oblastynda bolup geçen, köp sanly adam pidalaryna we şikes ýetmelerine, weýrançylyklara getiren gar süýşgünleri zerarly gynanç hatyny iberdi.
Döwlet Baştutany şu agyr pursatda gurban bolanlaryň dogan-garyndaşlaryna hem-de ýakynlaryna Türkmenistanyň halkynyň we Hökümetiniň adyndan, şeýle-de hut öz adyndan ýürekden gynanjyny, medet beriji sözlerini ýetirdi, ejir çekenlere bolsa tiz wagtda sagalmaklary baradaky dileglerini beýan etdi.
Güýçli gar ýagmagy netijesinde emele gelen äpet gar süýşgünleri 15-nji fewralda Täjigistanyň Horog şäherindäki ýaşaýyş jaýlaryna ýumruldy. Soňky maglumatlara görä, Daglyk-Badahşan awtonom oblastynda 18 adam aradan çykdy, 30-dan gowrak adam şikes aldy, dört sany ýaşaýyş jaýy dolulygyna ýumruldy, 35 sany jaý we bäş sany hojalyk desgasy bölekleýin ýumruldy.
