Amerikaly telekeçi Ilon Mask 2023-nji ýylyň aýagyna çenli Twittere direktor bellemekçidigini aýtdy. Häzirki wagtda ol bu wezipäni özi ýerine ýetirýär. Ol muny çarşenbe güni Dubaýda geçirilen Bütindünýä hökümet sammitinde wideoşekilli aragatnaşyk arkaly eden çykyşynda aýtdy diýip, TASS habar berýär.
"Ilki bilen kompaniýany durnuklaşdyrmalydyrys. Onuň maliýe saglygyny üpjün etmeli. Munuň üçin meýilnamalar takyk düzüldi. Şonuň üçin muňa gatybir ynamym bolmasa-da, ýylyň aýagyna çenli bolar diýip pikir edýärin" - diýip, ol degişli soraga jogabynda aýtdy.
27-nji oktýabrda amerikaly telekeçi Twitteri satyn almak üçin 44 milliard dollarlyk şertnama baglaşdy. Satyn alan dessine-de, kompaniýanyň ýolbaşçylarynyň birnäçesini, şol sanda baş direktor Parag Agrawal bilen maliýe direktory Ned Segaly işinden boşatdy. ABŞ-nyň Gymmatly kagyzlar we biržalar boýunça komissiýasynyň maglumatlar bazasynda ýerleşdirilen resminamalardan görnüşi ýaly, Mask direktorlar geňeşini hem dargadyp, kompaniýanyň ýeke-täk başlygy boldy.
