4-nji fewralda Gurbanguly Berdimuhamedow Türkmenistanyň Prezidentiniň tabşyrygy boýunça Aşgabat şäherine we Ahal welaýatynyň Arkadag şäherine iş saparyny amala aşyrdy.
Saparyň barşynda Türkmenistanyň Halk Maslahatynyň Başlygy alnyp barylýan gurluşyk işleriniň depginleri hem-de şähergurluşyk maksatnamasynyň ýerine ýetirilişi bilen tanyşdy.
Gurbanguly Berdimuhamedow paýtagtymyzyň günorta künjeginde N.Andalyp we Arçabil şaýollarynyň çatrygynda ýerleşýän köp zolakly ulag köprüsiniň ýanyna, Bekrewe köçesiniň Arçabil şaýoly bilen kesişýän ýerine, Saglyk ýolunyň başlanýan ýerine baryp gördi.
Soňra Halk Maslahatynyň Başlygy Ahal welaýatynyň täze, döwrebap edara ediş merkeziniň çägine baryp gördi. Ol ýerde Çagalar sagaldyş-dikeldiş merkeziniň gurluşugynda alnyp barylýan işleri synlady. Türkmenistanyň Prezidentiniň Diwanynyň iş dolandyryjysy H.Hajymyradowyň, Aşgabat şäheriniň häkimi R.Gandymowyň, Ahal welaýatynyň Arkadag şäheriniň häkimi Ş.Durdylyýewiň hem-de K.Babaýewiň gatnaşmagynda iş maslahatyny geçirdi.
