2022-nji ýylda aradan çykan Ýelizaweta II-niň portreti Awstraliýanyň 5 dollarlyk banknotlaryndan ýiter we Britaniýanyň tagty bilen birlikde Awstraliýanyň patyşasy titulyny miras alan ogly Karl III-niň keşbi bilen çalşylmaz. Banknotda monarhyň portretiniň deregine Awstraliýanyň ýerli ilatynyň medeniýetini we taryhyny şöhlelendirýän şekil peýda bolar diýip, Awstraliýanyň Ätiýaçlyk bankynyň habarynda aýdylýar. Muny rbc.ru ýetirýär.
Bäş dollarlyk kagyz pul Ýelizaweta II-niň portretini göterýän iň soňky Awstraliýa banknotydyr. Onuň keşbi ýurduň pullarynda heniz 1953-nji ýylda, ýagny Awstraliýada heniz dollar däl-de, funtlaryň bar wagty ýerleşdirilip başlandy. 1960-njy ýyllaryň ortalarynda şa aýalynyň portreti Awstraliýanyň ilkinji dollar kagyz pulunda, 1990-njy ýyllaryň başlarynda bolsa täze, ýurduň taryhyndaky ilkinji 5 dollarlyk plastik banknotda peýda boldy. 2016-njy ýylda “bäşlik” dizaýnyny üýtgetdi, ýöne şa aýalynyň portreti saklanyp galdy.
Awstraliýanyň Ätiýaçlyk bankynyň habarynda täze bäş dollarlyk banknotlaryň dizaýnyny işläp düzmek üçin birnäçe ýyl gerek boljakdygy we bu döwürde häzirki nusgadaky kagyz pullaryň dolanyşyga çykmagy dowam etjekdigi bellenilýär. Hatda täze “bäşlik” çykansoň hem ol kanuny töleg serişdesi bolup galar.
