Awstraliýanyň Qantas awiakompaniýasy awiasiýa taryhynda iň dowamly täjirçilik uçuşlaryny amala aşyrmaga taýýarlanýar. Täze gatnawlar Sidneý şäherini London we Nýu-Ýork bilen birleşdirer.
«Günüň dogşy» (Project Sunrise) diýlip atlandyrylýan taslamanyň çäginde ýolagçylar ýörite dizaýn edilen Airbus A350-1000ULR laýnerlerinde 22 sagatlap howada bolarlar. Yzygiderli gatnawlaryň 2027-nji ýylyň birinji ýarymynda başlamagy meýilleşdirilýär.
Täze uçar 20 000 litrlik goşmaça ýangyç bagy bilen enjamlaşdyrylyp, arakesmesiz örän uzak aralyklary aşmaga ukyplydyr.
Ýolagçylaryň rahatlygy üçin oturgyçlaryň sany adaty 300-den 238-e çenli azaldyldy. Boş ýerde bolsa islendik klasdaky ýolagçylaryň maşk edip, bedenini ýazyp bilmegi üçin ýörite tutawaçly we wideo-gözükdirijili zolak döredildi.
Ekonom-klasda oturgyçlaryň arasynyň uzaklygy 83,8 sm bolar. Deňeşdirmek üçin, bu görkeziji Turkish Airlines-da 81,3 sm, býujet awiakompaniýalarynda bolsa 76,2 santimetre deňdir. Birinji klasda bolsa ýolagçylara aýratyn ýatylýan düşekler we «A380» uçaryndakydan 50% has köp giňişlik hödürlener.
Qantas kompaniýasynyň baş direktory Wanessa Hadsonyň bellemegine görä, uçaryň içki bezegi sagat guşaklyklarynyň çalt çalşygy sebäpli döräp biljek biynjalyk ýagdaýlary azaltmak üçin ylmy esasda işlenip düzüldi.
«Bu gatnawlar ýol wagtyny 4 sagat gysgaldýan bolsa-da, ylmy dizaýn arkaly ýolagçylaryň özüni duýşuny has-da gowulandyryp, uzak syýahatlar baradaky düşünjäni bütinleý üýtgetmäge ukyplydyr» diýip, Hadson täze taslamanyň ähmiýetini nygtaýar.
Häzirki wagtda ilkinji uçar Tuluzada ýerdäki barlaglardan geçýär we iki aýlyk synag uçuşlaryna taýýarlanýar.
