Günorta Koreýanyň Samsung kompaniýasy Galaxy Unpacked tanyşdyrylyş dabarasynda Galaxy S23 smartfonlarynyň täze hataryny hem-de Galaxy Book 3 noutbuklaryny hödürledi. Bu barada rbc.ru habar berýär.
Smartfonlar hatarynyň iň kiçi modeli 1080 piksel durulykda 6,1 dýuým displeýe eýe boldy. S23+ smartfonynyň ekrany şol bir aýratynlyklar bilen 6,6 dýuýma, uly model S23 Ultra-nyň bolsa ekrany 6,8 dýuýma, durulygy 1440 piksele barabar.
Galaxy S23 10 Mp frontal kamera we üç modully esasy kamera eýe boldy: 50 Mp esasy kamera, 12 Mp ýokary giň burçly kamera we 10 Mp bolan üçünji kamera.
Bu hataryň esasy täzeligi 200 Mp ýokary durulykly sensor bolup, ony S23 Ultra modeli aldy. 2022-nji ýylyň fewral aýynda Samsung 108 Mp sensory bilen öňki Ultra modelini görkezipdi. Bu sensorlaryň durulygy näçe ýokary bolsa, olar ýagtylygy şonça-da köp alýarlar, bu bolsa gurluşyň has ýagty we jikme-jik surata alýandygyny aňladýar.
S23 Ultra 5000 mA/sag sygymly akkumulýatora eýe boldy. Toplumda onuň ýanynda S Pen stilusy bar. Täze smartfonlaryň üçüsinde-de Qualcomm amerikan kompaniýasyndan şol bir Snapdragon 8 Gen 2 flagman prosessory gurnalan. Şeýle-de bolsa, käbir ýurtlarda modeller Exynos çibi bilen hem elýeterli bolar. Kiçi modeliň akkumulýatorynyň sygymy 3900 mA/sag, S23+ modeliniň akkumulýatorynyňky bolsa 4700 mA/sag barabar.
Smartfonlaryň deslapky sargytlary 1-nji fewralda, satuwlar 17-nji fewraldan başlaýar. Galaxy S23 799 dollar, Galaxy S23+ 999 dollar, Galaxy S23 Ultra 1199 dollar bilen bahalandyrylýar.
Smartfonlardan başga-da, Samsung kompaniýasy tanyşdyrylyş dabarasynda üç modelden ybarat bolan noutbuklaryň täze hataryny hödürledi: Galaxy Book 3 Pro, Book 3 Pro 360 we Book 3 Ultra. Bu noutbuklaryň esasy aýratynlygy noutbugy planşete öwrüp, sensor ekrany ulanyp bolýandygyndadyr. Modeller Samsung-dan stilusy göterýärler.
Kompaniýanyň wekiliniň habar berşi ýaly, Book 3 Ultra yglan edilen hatarda “iň ýokary derejeli” modeldir. Ol 1800 piksel durulykda 16 dýuýmlyk OLED displeýi, Intel i9-13900H prosessory, Nvidia kompaniýasyndan RTX 4070 aýratyn grafiki prosessor, 32 Gb operatiw ýat, 1 Tb saklaýjy bilen üpjün edildi. Şol bir wagtyň özünde sensor ekran gönüden-göni panele gurnalan sensor datçikleri sebäpli adatdakysyndan has inçe we ýeňildir. Gurluş Samsung S Pen bilen hem gabat geler. Galaxy Book 3 Pro 360 noutbugyny 1800 piksel durulykda 16 dýuýmlyk OLED displeýi, Intel i5-1340P ýa-da i7-1360 prosessory, Intel grafikasy, 16 Gb operatiw ýat we 1 Tb çenli saklaýjy göwrümi bilen satyn almak bolýar, ol stilusy hem göterýär. Galaxy Book 3 Pro 14 dýuýmly ekran bilen elýeterli bolar.
Noutbuklaryň deslapky sargytlary 1-nji fewralda başlar. Modelleri 17-nji fewraldan satyn almak bolar. Galaxy Book 3 Pro modeliniň bahasy 1249 dollardan, Galaxy Book 3 Pro 360 – 1399 dollardan, Galaxy Book 3 Ultra – 2899 dollardan başlaýar.
