Apple kompaniýasy iPhone 18 Pro hatary üçin üpjünçilik zynjyryny jemlemegiň üstünde işleýär. Pudaklaýyn çeşmeleriň maglumatyna görä, kompaniýa şu aýyň dowamynda iPhone 18 Pro we iPhone 18 Pro Max modelleri üçin OLED displeýleriniň sertifikasiýasyny tamamlamagy meýilleşdirýär.
Ekranlaryň esasy üpjünçileri Günorta Koreýanyň Samsung Display we LG Display kompaniýalary bolar. Olaryň panelleri Apple-iň hili we öndürijiligi boýunça talaplaryna doly jogap berýär.
Mundan ozal iPhone 17 Pro seriýasy üçin displeý ýetiren Hytaýyň BOE kompaniýasy täze üpjünçiler sanawyna girmedi. Bilermenleriň pikirine görä, bu ýagdaý LTPO+ tehnologiýasy bilen panelleri öndürmekde ýüze çykan kynçylyklar we ýaramly önümleriň pes göterimi bilen baglanyşyklydyr.
LTPO+ tehnologiýasy täze smartfonlaryň iň möhüm täzelenmeleriniň biri bolar. Ol energiýa sarp edilişini azaltmaga, awtonom iş wagtyny (batareýanyň ömrüni) uzaltmaga, şeýle-de ýagtylyk şertlerine görä ekranyň ýagtylygyny we täzelenme ýygylygyny has takyk sazlamaga mümkinçilik berer.
Günorta Koreýanyň metbugat serişdeleri Samsung bilen LG-niň energiýa tygşytlaýjy displeýleri öndürmekde gazanan artykmaçlyklarynyň 2026–2027-nji ýyllar üçin üpjünçileri saýlamakda esasy faktor bolandygyny belleýärler.
