Aşgabada resmi saparynyň çäklerinde RF-niň Döwlet Dumasynyň Başlygy Wýaçeslaw Wolodin Türkmenistanyň Mejlisiniň deputatlarynyň öňünde çykyş etdi.
Wolodiniň çykyşynda bellemegine görä, parlamentleriň özara gatnaşyklaryny ugurdaş komitetleriň derejesinde ösdürmek zerur.
«Bu günki gün Russiýa bilen Türkmenistanyň özara gatnaşyklary deňhukuklylyk, hoşniýetli goňşuçylyk hem-de hormat goýmak ýörelgelerine esaslanyp, strategiki häsiýete eýedir. Türkmenistan bilen özara bähbitli hyzmatdaşlygy ösdürmek — biziň ileri tutýan ugurlarymyzyň biri» - diýip, Wolodin belledi.
Döwlet Dumasynyň Başlygy geçen ýyl diplomatik gatnaşyklaryň ýola goýulmagynyň 30 ýyllygynyň hem-de Russiýa Federasiýasy bilen Türkmenistanyň arasynda Dostluk we hyzmatdaşlyk hakynda Şertnamanyň 20 ýyllygynyň bellenendigini ýatlatdy. Geçen döwürde uly sepgitlere ýetildi, syýasy, ykdysady, ynsanperwer we beýleki ulgamlarda düýpli tejribe toplanyldy diýip, Wolodin belledi.
