24-nji ýanwarda Türkmenistanyň wise-premýeri, daşary işler ministri Raşid Meredow Özbegistanyň Prezidenti Şawkat Mirziýoýew bilen duşuşdy. Duşuşyk türkmen wekiliýetiniň Ykdysady Hyzmatdaşlyk Guramasynyň agza döwletleriniň daşary işler ministrleriniň Geňeşiniň 26-njy mejlisiniň çäklerinde Daşkentde geçirildi diýip, özbek Lideriniň metbugat gullugy habar berýär.
Duşuşygyň barşynda taraplar türkmen-özbek gatnaşyklaryny mundan beýläk-de ösdürmegiň, şol sanda ykdysadyýet, söwda, senagat, energetika, ulag we logistika ulgamlarynda, sebitara gatnaşyklary işjeňleşdirmekde we medeni-ynsanperwer alyş-çalyş etmekde meseleleri maslahatlaşdylar.
Bellenilişi ýaly, şu ýylyň birinji çärýeginde birnäçe bilelikdäki çäreler geçiriler — Hökümetara toparyň nobatdaky mejlisi, Suw hojalyk meseleleri boýunça Bilelikdäki toparyň mejlisi, Daşary işler ministrlikleriň arasyndaky syýasy geňeşmeler, medeni we beýleki çäreler bar.
