Türkmenistanyň Daşary işler ministrliginde hem-de Telewideniýe, radiogepleşikler we kinematografiýa boýunça Döwlet komitetinde Aşgabada iş sapary bilen gelen «Euronews» teleýaýlymynyň wekiliýeti bilen duşuşyk geçirildi.
DIM-de teleýaýlymyň wekilleri daşary işler ministriniň orunbasary B.Mätiýew bilen duşuşdylar. Diplomat teleýaýlymyň söwda we hyzmatdaşlyk boýunça wise-prezidenti Silwian Žan Iw Rože bilen bilelikdäki taslamalaryň geljegini we halkara habarlar giňişliginde özara hereket meselelerini maslahatlaşdy.
«Taraplar soňky onýyllygyň dowamynda ýola goýlan netijeli hyzmatdaşlygy kanagatlanma bilen bellediler. Onuň çäklerinde Türkmenistanda iri möçberli çäreleri şöhlelendirmek boýunça birnäçe üstünlikli taslamalary durmuşa geçirmek başartdy» diýip, Türkmenistanyň DIM-niň metbugat gullugy habar berýär.
«Euronews» teleýaýlymynyň wekilleri bilelikdäki işi işjeňleşdirmek hem-de hyzmatdaşlygyň täze formalaryny işläp düzmek boýunça taýýarlyklaryny mälim etdiler.
Telewideniýe, radiogepleşikler we kinematografiýa boýunça Döwlet komitetiniň ýolbaşçylary bilen geçirilen gepleşikleriň çäklerinde bilelikdäki habar materiallaryny taýýarlamak boýunça hyzmatdaşlyk meseleleri maslahatlaşyldy, Türkmenistanda durmuşa geçirilýän özgertmeleri, şol sanda halkara we sebit ähmiýetli wakalary şöhlelendirmek meselesine üns berildi.
Myhmanlar Telewideniýe, radiogepleşikler we kinematografiýa boýunça Döwlet komitetiniň binýadynda ýerleşen Halkara habarlar merkeziniň işi bilen tanyşdylar.
