Turiniň «Ýuwentusy», klubuň işindäki maliýe näsazlyklary sebäpli Italiýanyň çempionatynyň turnir jedwelinde 15 utukdan mahrum boldy. Bu barada Italiýanyň futbol federasiýasynyň (FIGC) metbugat gullugy anna güni habar berdi.
FIGC-iň federal prokurory ozal 2022-nji ýylyň 27-nji maýynda Federal şikaýat kazyýetiniň kararyny ýatyrtmak üçin şikaýat edipdi.
"Federal şikaýat kazyýeti prokuroryň arzasyny bölekleýin kabul etdi. Ýuwentusa garşy sanksiýalar häzirki futbol möwsüminde 15 jerime utugyny göz öňünde tutýar" – diýip, beýannamada aýdylýar .
Netijede, Ýuwentus sanawda üçünji orundan 10-njy orna geçdi, indi toparyň hasabynda 18 oýunda toplanan 22 utuk bar.
“Ýuwentusyň” öňki ýolbaşçylary 2022-nji ýylyň noýabr aýynyň ahyrynda işinden aýryldy. Anýelli we onuň topary ygtyýarnama bermegiň hem-de maliýe taýdan adalatly oýnamak düzgünlerini bozmakda aýyplandy: futbolçylaryň transfer bahasyny ýokarlandyrmak, işgärlere edilýän çykdajylar hakyndaky maglumatlary peseltmek we oýunçylaryň gazanýan aýlyk haklarynyň mukdaryny gizlemek. Koronawirus pandemiýasy wagtynda klub 17 oýunçy üçin takmynan 60 million ýewro töläpdir. Turinlileriň başlyklary oýunçylaryň aýlyklarynyň bir böleginden ýüz öwrendiklerini aç-açan aýtdylar, özleri bolsa kanunyň üstünden ätläp, bu pullary tölemek barada olar bilen şertleşipdirler. Şol sanda Kriştianu Ronaldu hem zyýan çekipdir. Klubuň portugaliýaly türgene henizem 19,9 million ýewro bergisi bar, ol kluby kazyýete bermek isleýär.
