Ýapon hökümeti COVID-19-yň ýuridiki derejesini 1-nji aprelden üýtgetmek we möwsümleýin dümew kategoriýasyna geçirmek isleýär. Şeýle karar 20-nji ýanwarda premýer-ministr Fumio Kişidanyň we ministrler kabinetiniň birnäçe agzasynyň gatnaşmagynda geçiriljek ýygnakda kabul ediler diýip, penşenbe güni Sankei gazeti habar berdi.
Häzirki wagtda COVID-19 Ýaponiýada ýokanç keselleriň ikinji kategoriýasyna degişli edildi, esasanam, koronawirus ýokuşanlar tutuşlygyna döwlet hasabyna bejerilmegini talap edýär. Şeýle-de, bu dereje COVID-19 bar diýlip güman edilýän adamlary karantinde saklamak ýaly mejbury çäklendirmeleri girizmäge mümkinçilik berýär.
Şeýle-de bolsa, gazetiň habaryna görä, 1-nji aprelden bu keseliň statusy, esasanam, möwsümleýin ýokanç keselleri öz içine alýan "bäşinji kategoriýa" derejesine düşer. Bejergini, ätiýaçlandyryş arzanladyşyny göz öňünde tutup, hassanyň özi töleýär. Şeýle üýtgeşmeler ýüze çykan halatynda COVID-19 sanjymy bölekleýin tölegli bolar. Şeýle-de bolsa, belli bir geçiş döwründe hökümet COVID bilen baglanyşykly çykdajylary doly öz üstüne almagy göz öňünde tutýar.
Şonuň ýaly-da, COVID-19-yň alamatlary bolan näsaglary kabul edýän hassahanalara subsidiýalary bermegi tapgyrlaýyn azaltmak meýilleşdirilýär.
Şol bir wagtyň özünde Ýaponiýada koronawirusyň ýokaşyş derejesi gaty ýokarylygyna galýar. Hususan-da, 18-nji ýanwarda kesellänleriň 125 müňden gowragy hasaba alyndy, 450 töweregi adam ýogaldy.
