Täze 2023-nji ýylyň ilkinji bäbegi Aşgabatdaky Enäniň we çaganyň saglygyny goraýyş ylmy-kliniki merkezinde aşgabatly öý hojalykçy Gülbahar hem-de telekeçi Nurmuhammet Mommadowlaryň maşgalasynda dünýä indi. Täze ýylyň ilkinji minutlarynda — 00:40-da olaryň ogul bäbegi dünýä indi.
«Watan» habarlar gepleşiginde habar berlişi ýaly, oglanjygyň ata-enesi Türkmenistanda 2023-nji ýylyň «Arkadag Serdarly bagtyýar ýaşlar ýyly» diýen şygaryndan ugur alyp, täze ýylda ilkinji dünýä inen bäbege Bagtyýar diýip at goýdular. Oglanjyk ozal 10 ýaşyndaky gyzy we 5 ýaşyndaky ogly bolan Mommadowlaryň maşgalasynyň üçünji perzendidir.
Doglan ogul bäbejigiň agramy 3 kilogram 840 gram we boýy 53 santimetr. Onuň ýagdaýlary kanagatlanarly. Oňa we enesine lukmanlar, şepagat uýalary tarapyndan hemme degişli gözegçilik işleri geçirilýär.
Oglanjygyň ata-enesine Türkmenistanyň Prezidentiniň hem-de Türkmenistanyň Milli Geňeşiniň Halk Maslahatynyň Başlygynyň iberen sowgatlary gowşuryldy.
