Niderlandly hüjümçi Kodi Gakpo «Liwerpulyň» hüjümçisi boldy. Mersisaýdlylar muny öz resmi saýtynda yglan etdiler. Resmi geçiş ýanwar aýynyň başynda, gyşky transfer penjiresiniň açylmagy bilen amala aşyrylar.
Futbolçy ozal Takumi Minaminonyň eýelän 18-nji belgisini aldy. Dirk Kýuýt, Alberto Moreno, Ýon Arne Riise we Antonio Nunýez hem şu belgide oýnapdylar.
«Mançester Ýunaýted» hem hüjümçini özüne almak isläpdi, ýöne «Liwerpul» PSW bilen gepleşiklerde has çakgan bolup çykdy. Žurnalistleriň berýän maglumatlaryna görä, mersisaýdlylar oýunça 42 million ýewrodan köpräk pul tölärler we bonuslary göz öňünde tutsaň, bu pul 50 million ýewro çenli artyp biler. Şertnama 2028-nji ýyla çenli hereket eder.
Gakpo PSW üçin ähli turnirlerde 20 gezek çykyş etdi. 23 ýaşly futbolçynyň hasabynda 13 gol we 17 sany netijeli pas bar. Şeýle-de, hüjümçi soňky dünýä çempionatynda Niderlandlaryň milli ýygyndysy üçinem üç pökgi geçirdi.
