Ahal welaýatynyň täze, döwrebap edara ediş merkezine şäher derejesi berildi we täze şähere «Arkadag» diýen at dakyldy. Degişli Karary Türkmenistanyň Milli Geňeşiniň Mejlisi kabul etdi. Bu barada 21-nji dekabrda geçirilen Ministrler Kabinetiniň giňişleýin göçme mejlisinde habar berildi.
Karara laýyklykda, Ahal welaýatynyň edara ediş merkezi Arkadag şäherine geçiriler. Ahal welaýatynyň Gökdepe etrabynyň 2370 gektar ýerleri Kararyň goşundysyndaky çyzga laýyklykda, Arkadag şäheriniň dolandyryş çägine geçiriler. Gökdepe etrabynyň Kärizek geňeşliginiň Aba Annaýew obasy Arkadag şäheriniň çägine goşulandygy sebäpli dolandyryş-çäk birlikleriniň hasabyndan çykarylar, Gökdepe etrabynyň Kärizek geňeşligi bolsa ýatyrylar.
Türkmenistanyň Oba hojalyk we daşky gurşawy goramak ministrligi Ahal welaýatynyň häkimligi bilen bilelikde Ahal welaýatynyň Arkadag şäheriniň dolandyryş çäkleriniň ýazgysyny bellenen tertipde geçirer.
