Fransiýanyň Eks-an-Prowans şäheri Ýewropanyň innowasiýalar paýtagty (iCapital) titulyna eýe boldy. Bu baýrak bilen her ýyl öz işinde innowasiýalary işjeň ulanýan we olaryň ösüşine goldaw berýän Ýewropa şäherleri sylaglanýar.
Mysal üçin, Eks-an-Prowansda köp sanly barlaghana we merkez bolup, olaryň üsti bilen ýerli ýaşaýjylar jemgyýetçilik transportyny, galyndylary, suw arassalaýyş işlerini, şäher meýilnamasyny, ykdysady ösüşi we daşky gurşawy goramak işlerini dolandyrmaga gatnaşyp bilýärler. Mundan başga-da, şäherde Fransiýada gaýtadan dikeldilýän energiýa çeşmelerine geçişe bagyşlanan ilkinji tehnologiýa seýilgähi bar. Häzirki wagtda bu şäherde energetika, agrotehnologiýa, suw arassalaýyş ýa-da “ýaşyl” himiýa pudagynda öňdebaryjy tehnologiýalary işläp düzýän 110 startap we kompaniýa hereket edýär.
Şeýle-de, “Ýewropulsyň” habar bermegine görä, şäherde zenanlar üçin ykjam programma işlenip düzüldi we işe girizildi, bu programma olara köçe yzarlamalaryndan goranmaga kömek edýär.
Eks-an-Prowans geljekki ösüş üçin 1 mln ýewro baýrak alar. Ýene iki finalçy şäher – Espoo (Finlýandiýa) we Walensiýa (Ispaniýa) – 100 müň ýewrodan alar.
Ilkinji Ýewropanyň innowasiýalar paýtagty 2014-nji ýylda Barselona boldy. Bu ada ÝB ýurtlaryndan we Horizon Europe Ýewropanyň gözlegleri we innowasiýalary goldamak maksatnamasyna gatnaşyjy ýurtlardan 250 müňden gowrak ilaty bolan şäher dalaş edip bilýär.
