Audi kompaniýasy dizaýnerlere kömek bermek maksady bilen ideýalaryň çeşmesi hökmünde emeli intellektden peýdalanyp başlady. Munuň üçin ol FelGAN ady bilen hususy programma üpjünçiligini işläp düzdi. Bu barada mag.auto.ru habar berýär.
FelGAN iru-giç her bir hudožnigiň ýüzbe-ýüz bolýan ideýa çökgünliginden gaçmaga kömek eder. Bu programma ýa-ha düýbünden täze dizaýnlary teklip etmegi, ýa-da täze görnüşleri döretmek üçin öň ulanylan çözgütleri birleşdirmegi başarýar. Häzirlikçe ol diňe teker diskleri bilen işleşýär, ýöne geljekde şeýle emeli intellekt konserniň beýleki bölümçelerinde hem kömek eder.
Programma üpjünçiliginde iki “bäsdeş” algoritm ulanylýar. Birinjisi, generator, özbaşdak şekilleri döredýär. Ikinjisi, diskriminator, olardan saýlananlara we tekerleriň hakyky suratlaryna seredip, her bir suraty kesgitlemäge synanyşýar. Prosesiň netijesinde generator döredijiligi şeýle bir real eder welin, olary hatda adam gözi bilen hakyky suratlardan tapawutlandyrmak hem kynlyk bilen başardar.
FelGAN janly dizaýnerleriň ýerini tutman, diňe olara kömek edýär. Dizaýnyň gutarnykly ýagdaýa getirilmegi, prototipleriň döredilmegi we beýleki nýuanslar adamyň elinde galýar. Mundan başga-da, hudožnikler programma täze stili oýlap tapmak üçin esas boljak surat nusgalaryny ýüklemek arkaly döredijilik ugruny görkezip bilerler.
