Tesla we SpaceX kompaniýalaryny esaslandyryjy Ilon Mask dünýäniň iň baý adamlarynyň sanawyndaky birinji ýerini elden berdi. Forbes-iň we Bloomberg-iň hasaplamalaryna görä, indi dünýäde iň baý adam LVMH lýuks klasly harytlary öndürýän kompaniýanyň ýolbaşçysy Bernar Arnodyr diýip, BBC ýazýar.
Forbes-iň maglumatlaryna görä, häzir Maskyň baýlygy 178 mlrd dollardyr. Ol Tesla elektromobillerini öndürýän kompaniýanyň 14%-ne eýelik edýär, şeýle-de ol oktýabr aýynda 44 mlrd dollara Twitter sosial toruny satyn aldy.
Arnonyň jemi baýlygy 188 mlrd dollardyr.
LVMH - zynatly närseleriň önümçiligi bilen meşgullanýan fransuz konglomeraty. Kompaniýa 1987-nji ýylda Louis Vuitton modalar öýüniň we Moet Hennessy kompaniýasynyň goşulyşmagy netijesinde esaslandyryldy. Şu günki gün LVMH 75 sany lýuks brendlerini özünde birleşdirýär. Telekeçilik işini Arnonyň maşgalasy dolandyrýar.
"Twitter"-i satyn almak bilen utgaşan köp sanly dawa-jenjelleriň we kazyýet arzalarynyň fonunda Teslanyň bahasynyň peselendigini bellemek gerek. Ondan hem başga, sosial tory satyn almakçy bolup Mask ulag öndürijiniň milliardlarça dollarlap paýnamalaryny satdy. Üstesine, inwestorlar ykdysadyýetdäki umumy pese düşüşligiň we karzlaryň bahasynyň ýokarlanmagynyň fonunda Tesla elektromobillerine islegiň peselmeginden ätiýaç edýärler. Şeýle-de, Tesla kemçilik sebäpli özüniň käbir awtoulaglaryny yzyna çagyrmaga-da mejbur boldy.
